“…Aua ne’i ia te i matou, Le Alii e, aua ne’i ia te i matou, a ia tuuina atu le viiga i lou suafa, ona o lou alofa ma lou faamoani…”, Salamo 115: 1
O Samoa ua uma ona tofi.
E lē tau faama’itea fo’i le vaosā o ona tapuafanua, tulou!
Ae o fatuga o manatu, se ua ta lili’a i mafaufauga.
Ua ta popole ne’i faitau mai, pe aisea ua logo liaina ai se tala a le auauna faatauvaa.
A’o le agaga moni, e le uma le loto faafetai.
Faafetai tele i le Asosi a Malisi Pago Pago
Malo le faama’ite! Malo fo’i le taulagalaga i mea lelei! Malo le faamati’e!
E lē mafai ona pōnā i vao lo tou tautigā, Aisea?
O loo silasila le Atua i fatifatiga o le ala sa outou uia.
A lea ua vaaia ataata o Taulelei i fua o a outou galuega.
Faafetai mo le faatupeina o fuafuaga a le Iuni Lakapi a Amerika Samoa i lenei tausaga na manuia ai le faamoemoe o le Iuni.
E le galo fo’i le Faafetai i le faigamalo, aemaise tagatanu’u o Amerika Samoa ona o le lagolagosua pea i taumafaiga a le Iuni Lakapi mo le atinaeina o le taaloga i totonu o le atunu’u.
Ia manuia taumafaiga a ‘au o le a tausinio i lenei faamoemoe a Malisi Pago Pago i lana taamilosaga fa’avaomalo lona fa e taualuga ai le faamanatuina o le Fu’a a Amerika Samoa 2023.
O mai la’ia, “Tatou Aleaga Faatasi”!
Falefata Sailimalo Su Moli Taai Lemana
Peresetene/Taitaifono
